مقال مهم جدا انشره فربما تكون سببا في اقلاع احدهم عن التدخين باذن الله تعالى ======================================== لماذا تدخن ؟! معظم الاشخاص المدخنين لما بتسألهم بتشرب سجاير ليه ؟ في منهم اللي بيقول بنفخ واطلع في السجاره همي وفي اللي بيقول كتر المشاكل هو اللي خلاني ادخن وفي اللي يقول دي عاده اتعودت عليها اعمل ايه وبتلاقي الشباب في سن المراهقة بيدخنوا من مبدأ حب الاستطلاع احيانا واحيانا انه بيكون فاهم غلط انه كدا بيعبر عن رجولته بتصرفات الكبار حتى ولو كانت غلط واحيانا بسبب اصدقاء السوء ... من الكلام السابق تلاحظ ان ارتباط المدخنين بالتدخين ارتباط نفسي اكثر من كونه ارتباط جسدي( الارتباط الجسدي لا يكاد يذكر اذا ذكر مع الارتباط النفسي ) تخيل انك لو كسرت حاجز الارتباط النفسي يبقى انت قضيت على معظم المشكله ... هتقولي ازاي وانا هقول لك بعض النصائح لكثرة الكل : اولا التوبه النصوح الخالصه لو جه الله يعني لا يكفي انك تقول يا رب تب علي وانت ماسك السيجاره لانك بكدا ما حققتش شروط التوبه كلها اللي هي : أ- الإخلاص في التوبة . ب- الإقلاع عن ذنبه . ج- الندم على ذنبه . د- العزم على عدم رجوعه إلى الذنب . ه- التوبة في الوقت الذي تقبل فيه التوبة ، فلا يقبل الله التوبة عند الغرغرة قبل قبض الروح ، ولا بعد طلوع الشمس من مغربها . و- إرجاع الحقوق إلى أهلها إن كانت معصيته تتعلق بحقوق الآدميين . ثانيا الصبر عن المعصية دي :تخيل انك لما تصبر عن المعصيه فانت في مرتبه اعلى في الصبر من الانسان اللي بيصبر على المقدور ( يعني اللي بتحصله مثلا حادثه او مصيبه وبيصبر عليها ) ثالثا : انك تبعد قدر المستطاع عن التجمعات اللي كنت بتقعد فيها مع اصحابك وتشربوا سجاير لانك في فتره الاقلاع عن التدخين وخصوصا في البدايه ممكن ترجع ليه بسهوله اذا مكنش عندك عزيمه واراده قويه رابعا : لازم تكون حاطط قدام عينيك موضوع مهم وهو انك هتبطل النهارده بارادتك وانت بصحتك لكن بكره اذا تماديت ممكن لا قدر الله يصارحك الطبيب انك لازم تسيب التدخين لاصابتك بامراض خطيرة بسبب التدخين وساعتها هتندم ولكن بعد فوات الاوان ... خامسا : حاول تزور اقرب مستشفى ليك وخصوصا مستشفيات امراض الصدر او اقسام امراض الصدر في المستشفيات وهتلاقي العشرات بل المئات من المرضى بسبب التدخين وكلهم بيقولوا بنتمنى يرجع بينا العمر لورا وكنا بطلنا التدخين بنفسنا بدل ما احنا بطلناه دلوقتي غصب عننا ونايمين على السراير ومش عارفين نمارس حياتنا اللي اتحولت لجحيم والام وأهات وسهر في الليالي ... سادسا : حط قدام عينيك قول المولى عز وجل ( ولا تلقوا بايديكم الى التهلكه ) وقوله تعالى ( واحل لكم الطيبات وحرم عليكم الخبائث ) ولو بتحب ربنا بجد وعايز تثبت لنفسك مقدار حبك ليه على قد ومقدار طاعتك ليه يبقى اكيد هتبطل التدخين ... سابعا : لازم تعرف ان نفسك وجسدك ده امانه هتتحاسب عليها يوم القيامه يعني ما تفكرش انك حر في نفسك تعمل فيها اللي انت عايزه وتدمرها زي ما انت عايز لا بالعكس دا من اول الحجات اللي ربنا عز وجل هيسألك عنها يوم القيامه.. قال خير الانام " لا تَزُولُ قَدَمَا الْعَبْدِ يَوْمَ الْقِيَامَةِ حَتَّى يُسْأَلَ عَنْ أَرْبَعٍ : عَنْ عُمْرِهِ فِيمَا أَفْنَاهُ , وَعَنْ شَبَابِهِ فِيمَا أَبْلاهُ , وَعَنْ مَالِهِ مِنْ أَيْنَ اكْتَسَبَهُ وَفِيمَا أَنْفَقَهُ , وَعَنْ عِلْمِهِ مَاذَا عَمِلَ فِيهِ " . ثامنا : فكر في الموضوع من الناحيه الماديه يعني انت لو شاب بتأخد مصاريف من اهلك يبقى والدك يشقى في العمل علشان يوفرلك سبل الراحه وانت تضيع الفلوس بكل سهوله كدا ولا في ايه كمان دي في حاجه بتدمر صحتك ... ولو انت بتشتغل وعايز تجوز مش احسنلك توفر الفلوس دي علشان تعف نفسك ... ولو انت متجوز وعندك عيال مش اولادك اولى بالفلوس دي انك تصرفها في تربيتهم ... وحتى لو بتربي اولادك كويس مش خايف انهم يقلدوك لما يكبروا وتكون انت السبب في تدمير صحتهم ... طيب ليه ما تتصدقش بتمن علبه السجاير وصدقة تنفعك في يوم لا ينفع مال ولا بنون تاسعا : ما تحطش لنفسك مبررات انك خلاص معدش هتقدر وازاي هقدر وتحبط نفسك وتقلل من عزيمتك لانك عندك عزيمه وانت مش واخد بالك منها وهتقولي فين ؟ هقلك فاكر في رمضان كنت بعيد عن التدخين كام ساعة ؟ 16 ساعه تقريبا يبقى عندك عزيمه ولا لا ؟ عاشرا : اياك والتسويف وتأجيل موضوع انك تبطل التدخين لازم نيه قويه لو انت ماسك سيجاره دلوقتي طفيها وارميها حالا وارمي علبه السجاير في الحال... دي بعض النصائح لكسر الارتباط النفسي بالتدخين اما الارتباط الجسدي ان وجد ففيه ادويه طبيه طبعا لازم تكون باستشاره طبية وفي بعض الدول عياده خاصه للمعالجه من التدخين والاطباء فيها برضه بهيؤاالمريض نفسيا للاقلاع عن التدخين وثانيا بيستخدموا بعض الادويه اذا كانوا محتاجين ليها وفي اخر كلامي افتكر كويس انك هتحاسب على صحتك وشوف ساعتها هيكون ردك ايه ( وساعتها مش هتلاقي رد ترد بيه ) ؟ وافتكر دايما :حاسبوا انفسكم قبل ان تحاسبوا انا حاولت على قد ما اقدر اني ابسط الكلمات واتمنى من الله عز وجل ان تصل كلماتي للقلوب وان اصبت فيما اقول فمن الله وان اخطأت فمن نفسي والشيطان
0 التعليقات:
إرسال تعليق